Në drejtimin e kryetarit z. Anastas Angjeli, komisioni për Ekonominë dhe Financat shqyrtoi projektligjin "Për përkthimin zyrtar dhe profesionin e përkthyesit zyrtar".

Të ftuar për këtë projektligj ishin përfaqësues nga ministria e Drejtësisë z. Klajd Karameta dhe nga ministria e Financave dhe Ekonomisë znj. Mimoza Paço.

Z. Karameta në fjalën e tij u shpreh se ky projektligj parashikon rregullimin e shërbimit të përkthimit zyrtar, si dhe të statusit të përkthyesit zyrtar të licencuar nga Ministria e Drejtësisë dhe ka për qëllim përcaktimin e kushteve për mirëfunksionimin e shërbimit të përkthimit zyrtar në Republikën e Shqipërisë, si dhe mbrojtjen dhe garantimin e ushtrimit të profesionit të përkthyesit zyrtar, si një profesion i lidhur me sistemin e drejtësisë në funksion të garantimit të një procesi të rregullt ligjor dhe ushtrimit të veprimtarisë në mënyrë të pavarur e gjithashtu në mbështetje të ligjit.

Relatorja znj. Reme Lala theksoi se ky ligj ka për qëllim përcaktimin e kushteve për mirëfunksionimin e shërbimit të përkthimit zyrtar në Republikën e Shqipërisë, si dhe mbrojtjen e garantimin e ushtrimit të profesionit të përkthyesit zyrtar.

Pas diskutimeve, anëtarët e komisionit e miratuan këtë projektligj në parim, nen për nen dhe në tërësi.

Çështja e dytë e rendit të ditës që komisioni shqyrtoi ishte projektligji "Për shërbimin e kontrollit të brendshëm dhe ankesat në sistemin e ekzekutimit të vendimeve penale". Të ftuar për këtë projektligj ishin nga ministria e Drejtësisë z. Klajd Karameta dhe nga ministria e Financave dhe Ekonomisë znj. Vilma Causholli.

Z. Karameta nwnvizoi se projektligji synon një reformim të shërbimit duke u organizuar si strukture e veçantë e ministrisë së Drejtësisë, në varësi të drejtpërdrejtë të ministrit i cili ka kompetenca hetimore dhe gjurmuese dhe ky shërbim transformohet në modelin më demokratik si në aspektin e misionit po edhe atë të detyrave funksionale, duke marrë edhe atributet e policisë gjyqësore.

Pas diskutimeve, komenteve e sugjerime të ndryshme, ky projektligj u miratua në parim, nen për nen dhe në tërësi.

Mbledhja e komisionit vazhdoi me shqyrtimin e planit Vjetor 2021 për zbatimin e programit të statistikave zyrtare 2017 – 2021. E ftuar për këtë çështje ishte znj. Elsa Dhuli drejtoresha e përgjithshme e INSTAT.

Në fjalën e saj znj. Dhuli u shpreh se dokumenti në fjalë paraqet aktivitetet statistikore që do të kryhen nga INSTAT, Banka e Shqipërisë dhe Ministria e Financave dhe Ekonomisë gjatë vitit 2021, sipas fushave përkatëse statistikore që mbulojnë, shoqëruar me afatet dhe periodicitetet e zbatimit etj.

Relatori i çështjes z. Anastas Angjeli theksoi se Plani Vjetor 2021 është në përputhje me dokumentin e ngjashëm i cili aplikohet nga vendet e tjera anëtare të BE-së, mbështetur në nenin 17 të Rregullores (KE) 223/2009 të Parlamentit Evropian dhe të Këshillit, datë 11 mars 2009 “Mbi statistikat evropiane, e cila shfuqizon Rregulloren (KE, Euroatom), Nr. 1101/2008 të Parlamentit Evropian dhe të Këshillit mbi dërgimin e të dhënave, të cilat i nënshtrohen konfidencialitetit statistikor, Zyrës Statistikore të Komuniteteve Evropiane, Rregulloren e Këshillit (KE) Nr. 322/97, Mbi Statistikat e Komunitetit dhe Vendimin e Këshillit 89/382/EEC, Euroatom për krijimin e një komisioni mbi programet statistikore të Komuniteteve Evropiane”.

Pas diskutimeve, projektvendimi u miratua me votë nga anëtarët e komisionit dhe i përcillet seancës Plenare.

Po ashtu, kryetari Angjeli njohu anëtarët e komisionit me projektvendimin e Kuvendit për përcaktimin e fondit për subjektet zgjedhore pjesëmarrëse në zgjedhjet 2021, ku pas diskutimeve u miratua me votë nga anëtarët e komisionit.

Mbledhja u zhvillua nëpërmjet platformës së komunikimit virtual "Cisco Webex”.