23 nëntor 2018

Komisioni për Veprimtarinë Prodhuese, Tregtinë dhe Mjedisin, në drejtimin e kryetarit, z. Eduart Shalsi, miratoi gjatë mbledhjes së sotme, në cilësinë e komisionit përgjegjës, dy projektligje: “Për aderimin e Republikës së Shqipërisë në amendamentin e Kigalit të protokollit të Montrealit, “Për substancat që hollojnë shtresën e ozonit”” dhe “Për aderimin e Republikës së Shqipërisë në marrëveshjen e Lisbonës për mbrojtjen e emërtimeve të origjinës dhe regjistrimin e tyre ndërkombëtar”. Gjithashtu, komisioni shqyrtoi dhe miratoi nen për nen dhe në tërësi projektligjin “Për buxhetin e shtetit 2019” dhe paketën fiskale të lidhur me të.

Për projektligjin e parë, të pranishëm në komision ishin përfaqësues nga Ministria e Mjedisit Turizmit, ndërsa, lidhur me aderimin në marrëveshjen e Lisbonës, të pranishëm ishin përfaqësues nga Drejtoria e Përgjithshme e Pronësisë Industriale, përkatësisht drejtori i Përgjithshëm, z. Elvin Lako. Ndërsa, për shqyrtimin e projektbuxhetit dhe paketës fiskale, të pranishëm në komision ishin z. Ilir Halilaj, zëvendësministër i Bujqësisë dhe përfaqësues nga Ministria e Financave.  Komisioni, pasi deputetët dhanë sugjerimet përmes diskutimeve, si edhe shtruan pyetje për çështje të caktuara,  miratoi të tre projektligjet në diskutim për mbledhjen e sotme.