Komisioni për Politikën e Jashtme miratoi dy marrëveshje të rëndësishme. Në fillim të mbledhjes, kryetarja e komisionit znj. Mimi Kodheli falenderoi anëtarët për bashkëpunimin gjatë gjithë vitit të shkuar si edhe vazhdimi i tij për këtë vit.

Të ftuar për projektligjin “Për ratifikimin letër marrëveshjes ndryshuese të marrëveshjes së huasë, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim (IBRD), për financimin shtesë të projektit “Siguria e digave”, të ratifikuar me ligjin nr. 40/2012”, ishin znj. Dorina Çinari, zëvendësministre për Infrastrukturën dhe Energjinë, z. Agim Bregasi drejtor në ministrinë për Infrastrukturën dhe Energjinë, z. Fatos Bundo drejtor në KESH .

Në prezantimin e projektligjit znj. Çinari theksoi se siguria e digave është një projekt i madh dhe kërkohet një rialokim fondesh brenda për përbrenda vlerës së investimit pa ndryshuar tavanin, thjesht rialokim nga zëri i asistencës teknike në një zë që është investime.

“Qëllimi i gjithë projektit është të përforcohet dhe të monitorohet siguria e digave, me qëllimin që të kemi sigurimin me energji elektrike dhe siguri të sistemit elektroenergjitik.”, tha ndër të tjera znj. Çinari.

Për projektligjin “Për ratifikimin e marrëveshjes statusore, ndërmjet Republikës së Shqipërisë dhe Bashkimit Evropian, mbi veprimet e ndërmarra nga Agjencia e Rojes Bregdetare dhe Kufirit Evropian në Republikën e Shqipërisë”, ishin të ftuar z. Julian Hodaj zëvendësministër i Brendshëm, znj. Aida Hajnaj zëvendësdrejtore e Kufirit, znj. Renata Balliu përgjegjëse Sektorit të Këshillimit Ligjor, Drejtoria e Programimit, Standardizimit dhe Harmonizimit të Kuadrit Rregullator etj.

Në prezantimin e këtij projektligji, zëvendësministri Hodaj tha se kjo është një marrëveshje e cila fokusohet në statusin e oficerëve të Frontex që do të operoje në Shqipëri dhe do të pasohet nga marrëveshje operacionale, përsa i përket detajeve dhe procedurave të veprimeve në terren.

“Veprimet operacionale që do të kryhen janë gjithmonë në prani ose të shoqëruar nga forcat e policisë shqiptare që janë përgjegjëse për kufirin, për menaxhimin e kufirit.”, u shpreh z. Hodaj.

Relatorja e këtij projektligji znj. Elona Gjebrea, në fjalën e saj tha se kjo është një marrëveshje shumë e rëndësishme dhe bashkëpunimi operacional ndërmjet Shqipërisë dhe shteteve anëtare të Bashkimit Evropian realizohet ndërmjet kësaj marrëveshje.

Pas diskutimeve, projektligjet u miratuan nen për nen dhe në tërësi.