Komisioni për Politikën e Jashtme u mblodh sot nën drejtimin e kryetares  znj. Mimi Kodheli dhe  shqyrtoi projektligjin "Për disa shtesa dhe ndryshime në ligjin nr.139/2015, “Për vetëqeverisjen vendore”.

Ndryshimi në këtë projektligj vjen si rezultat i kërkesave për implementimin e dispozitave kushtetuese për mbrojtjen e të drejtave të shqiptarëve që jetojnë jashtë kufijve, qasjen drejt një ndërgjegjeje evropiane në drejtim të afirmimit të padiskutueshëm të rëndësisë që ka diaspora në ndërtimin e urave lidhëse me vendin e origjinës si edhe ndërgjegjësimin për influencën pozitive që ka diaspora në zhvillimin ekonomik, politik e kulturor të vendit të origjinës. I ftuar për prezantimin e këtij projektligji ishte ministri i Shtetit për Diasporën z. Pandeli Majko. .

Në fjalën e tij z. Majko  vuri në dukje se ndryshimet kanë të bëjnë me infrastrukturën e pushtetit lokal. Sipas ministrit të Shetit për Diasporën, njerëzit të cilët duan të krijojnë lidhje me vendlindjen, duhet të kenë edhe infrastrukturën administrative, që të përgjigjet për këtë marrëdhënie të kërkuar.

“Ky ndryshim është vlerësuar nga Këshilli i Marrëdhënieve të Pushtetit Lokal me Qeverinë, si një ndryshim shumë i rëndësishëm, i arsyeshëm dhe që i përgjigjet interesave të komuniteteve, që bashkitë përfaqësojnë. Janë komunitete që fillojnë jo vetëm tek ata që jetojnë në Shqipëri, por dhe ata jashtë vendit”, theksoi ndër të tjera z. Majko.

Relatori i projektligjit z. Adnor Shameti tha se ngritja e këtyre zyrave për koordinimin e veprimtarive të diasporës në të gjitha organet e vetëqeverisjes vendore, është e domosdoshme.

“Theksoj që ligji nuk ka asnjë efekt financiar në kuptimin e efekteve që mund të sjellë, kështu që për sa më sipër j‘u ftoj ta mbështesim unanimisht.”, u shpreh z. Shameti.

Pas diskutimeve, pyetje dhe komenteve, nga anëtarët e tjerë të këtij komsioni,  projektligji u miratua në parim.