Kryetari i Kuvendit, z. Gramoz Ruçi priti Shefen e Zyrës së Këshillit të Evropës në Tiranë, znj. Jutta Gützkow. Këshilli i Evropës, mision vëshgues për zgjedhjet e 30 qershorit

  • Postuar më, 15/05/2019

  Kryetari i Kuvendit, z. Gramoz Ruçi priti sot në takim Shefen e Zyrës së Këshillit të Evropës në Tiranë, znj. Jutta Gützkow. Duke i uruar mirëseardhjen dhe suksese në detyrën e re si Shefe e Zyrës së Këshillit të Evropës në Tiranë, Kryetari i Kuvendit, z. Gramoz Ruçi vuri në dukje se bashkëpunimi i Kuvendit të Shqipërisë me Zyrën e Këshillit të Evropës ka qenë i shkëlqyer dhe shprehu bindjen se ky bashkëpunim do vijojë të jetë frytsjellës.

 “Kemi bashkëpunuar me zyrën e KiE në Tiranë për përgatitjen e disa ligjeve të rëndësishme, si Ligji për Reformën ne Drejtësi,  Reforma Zgjedhore, Ligji për Pakicat Kombëtare, Ligji për Reformën Administrative etj. Ka qenë një ka qenë një bashkëpunim i shkëlqyer dhe në shërbim të politikave reformuese në vendin tonë. Ndërkohë, do të sugjeroja qe në kuadër të 70-vjetorit të themelimit të Këshillit të Evropës të organizonim aktivitete të përbashkëta mes Kuvendit dhe Zyrës suaj për të kremtuar këtë përvjetor të organizatës lidere të të drejtave të njeriut.”, nënvizoi Kryetari i Kuvendit.

 Shefja e Zyrës së Këshillit të Evropës, znj. Jutta Gützkow, falenderoi Kryetarin e Kuvendit për bashkëpunimin e deritanishëm midis Kuvendit dhe Zyrës së Këshillit të Europës dhe e siguroi për vijimin e bashkëpunimit edhe në të ardhmen. Znj. Gützkow njoftoi Kryetarin se Kongresi i Autorieteve Lokale kishte vendosur dërgimin një misioni vëshgues për zgjedhjet e 30 qershorit 2019, i cili do të jetë në Shqipëri në periudhën 26 qershor-1 korrik 2019.

 Në fokus të bisedës gjatë takimit ishin edhe bashkëpunimi me Komisionin e Venecias dhe opinionet e kerkuara për projekt-ligjet nga Kuvendi i Shqipërise, situata politike në vend, dhe ecuria e procesit të integrimit të Shqipërisë në BE.