Kryetari i Kuvendit, z. Gramoz Ruçi, uron Shenjtërinë e Tij Haxhi Dedë Edmond Brahimaj në 60 vjetorin e lindjes:"Bektashizmi, përkushtim për jetë më të mirë, komb më të fortë, shoqëri më të drejtë"

  • Postuar më, 19/05/2019

Kryetari i Kuvendit, z. Gramoz Ruçi, i dërgoi sot një leter të ngrohtë urimi Shenjtërisë së Tij Haxhi Dede Edmond Brahimaj në 60 vjetorin e lindjes.

“I dashur dhe i respektuar Baba Mondi,
Me rastin e 60 vjetorit të ditëlindjes, Ju uroj shëndet, jetë të gjatë dhe një udhëheqje të suksesshme, në krye të komunitetit të Bektashinjve shqiptarë dhe të gjithë botës.
Lidershipi Juaj si Kryegjysh Botëror i Bektashinjve është një provë dhe trashëgimi e urtësisë, mirësisë dhe fryëmëzimit për të gjithë besimtarët Bektashi.
Ju i kini inspiruar dhe vazhdoni t’i inspironi besimtarët Bektashi të Shqipërisë dhe më gjerë drejt tolerancës, mirëkuptimit dhe bashkëjetesës harmonike me besimtarët e komuniteteve të tjera fetare.
Bektashinjtë janë shquar gjithmonë për vlerat e përkushtimit, humanizmit, patriotizmit e paqes dhe nën drejtimin Tuaj këto vlera janë zhvilluar e pasuruar më tej. Rrezatimi i këtyre vlerave në shoqëri i ka bërë shqiptarët më sakrifikues e më solidarë, më të dhimbsur e më atdhetarë, më të dashur e më të respektuar.
Këto vlera, janë sot më të dëshiruara se kurrë dhe i bashkohen përpjekjeve të të gjithë shqiptarëve, nëShqipëri dhe Diasporë, për një jetë më të mirë, për një komb më të fortë, për një shoqëri më të drejtë dhe për një të ardhme më të garantuar, pranë familjes europiane dhe kombeve të qytetëruara.”, shkruan në letrën e urimit Kryetari i Kuvendit, z. Gramoz Ruçi.