Kryetari i Kuvendit, z. Gramoz Ruçi, priti Ambasadoren e Republikës së Greqisë, znj.Eleni Sourani: Nuk ka asnjë pengesë për fuqizimin e bashkëpunimit shqiptaro-grek

  • Postuar më, 06/09/2019


6 shtator 2019 

Kryetari i Kuvendit, z. Gramoz Ruçi, priti ambasadoren e Republikës së Greqisë, znj. Eleni Sourani, me rastin e mbarimit të mandatit të saj në Shqipëri.

Kryetari Ruçi e falënderoi ambasadoren Sourani për shërbimin e saj në të mirë të forcimit të marrëdhënieve e të bashkëpunimit midis të dy vendeve.

“Shqipëria dhe Greqia janë dy vende fqinje dhe mike. Marrëdhëniet dhe bashkëpunimi ynë duhet të thellohen. Nuk ka asnjë pengesë për fuqizimin e bashkëpunimit shqiptaro-grek. Emigrantët shqiptarë në Greqi dhe minoritarët grekë në Shqipëri shërbejne si ura të fqinjësisë e miqësisë miidis të dy vendeve. Popujt tanë kanë treguar se dinë të merren vesh e të bashkëpunojnë me njeri-tjetrin më mirë sesa qeveritë”,- theksoi Kryetari i Kuvendit, z. Gramoz Ruçi.

Ambasadorja Sourani e falënderoi Kryetarin Gramoz Ruçi për mbështetjen e Kuvendit të Shqipërisë si edhe për kontributin personal në oërmirësimin e marrëdhënieve midis të dy vendeve. “Urtësia juaj ka qenë një mbështetje e madhe për përmirësimin e marrëdhënieve dypalëshe. Nuk ka asnjë rrethanë midis të dy vendeve tona që të pengojë fuqizimin e miqësisë e të marrëdhenieve midis Shqipërisë e Greqisë. Rreth 65 mijë familjet e përziera shqiptaro-greke janë një faktor tjetër për fuqizimin e miqësisë midis popujve.”,-nënvizoi Ambasadorja Sourani.