Kryetari i Kuvendit, Gramoz Ruçi, priti sot në takim Ambasadorin e ri të Republikës së Italisë të akredituar në Tiranë, Sh.T.Z. Fabrizio BUCCI.

  • Postuar më, 16/01/2020

16 janar 2020


Pasi e përgëzoi z. Bucci për detyrën, Kryetari i Kuvendit vlerësoi marrëdhëniet e shkëlqyera politike me Italinë, si parter strategjik i Shqipërisë dhe vend mik që i është gjendur Shqipërisë në momentet e vështira, por edhe si një mbështetëse e pakursyer në rrugëtimin e Shqipërisë drejt proceseve të integrimit euro-atlantik.

 

“Italia është partneri ynë strategjik dhe ka pasur nje rol të rëndësishëm në jetën e shqiptarëve edhe para rënies së komunizmit, si e vetmja dritare që na lidhte me perëndimin. Vendi juaj mikpriti fluksin e refugjatëve shqiptarë fillim të viteve ’90, të cilët tashmë janë tërësisht të integruar dhe kontribuues në zhvillimin dhe ekonominë e Italisë – ura më e fortë lidhëse mes dy vendeve tona. Jemi shumë mirënjohës për mbështjen tuaj të vazhdueshme në procesin e integrimit evropian. Vlerësojmë praninë tuaj të menjëhershme gjatë fatkeqësisë natyrore të 26 nëntorit, mbështetje që besoj do vijojë të jetë e pranishme ndërkohë”.

 

Duke e falenderuar Kryetarin e Kuvendin për mundësinë e takimit, Ambasadori i Italisë u shpreh se Shqipëria eshtë një vend i veçantë për Italinë, ashtu si edhe Italia për Shqipërinë. “Dy vendet tona i lidh një e shkuar e rëndësishme, i bashkon një e tashme e rëndësishme, por mbi të gjitha, na pret një e ardhme e rëndësishme,” u shpreh z. Bucci. “Italia do vijojë të jetë një mbështetëse e fortë e Shqipërisë për integrimin evropian pasi e konsiderojmë hapjen e negociatave strategjike, veçanërisht në këtë faze ku një prej shteteve anëtare të BE ka vendosur të largohet, aspirata për integrim të vendeve si Shqipëria tregon se projekti evropian vijon të ekzistojë dhe të jetë i rëndësishëm”.

 

Gjatë takimit u vlerësua niveli shumë i mirë i marrëdhënieve dhe shkëmbimeve ndërparlamentare, niveli i shkembimeve tregtare dhe ekonomike dhe u nënvizua fakti që ka ende shumë potencial për t'u përdorur në intensifikimin e bashkëpunimit në këto fusha.

 



Share