Kryetari i Kuvendit, z.Gramoz Ruçi dhe Kryetari i Grupit Parlamentar të Partisë Socialiste z.Taulant Balla, takim në Fondin Saudit për Zhvillim

  • Postuar më, 19/02/2020

Gjatë qëndrimit në Arabinë Saudite Kryetari i Kuvendit, z.Gramoz Ruçi dhe Kryetari i Grupit Parlamentar të PS, z. Taulant Balla zhvilluan një takim në Fondin Saudit për Zhvillim ku u pritën nga Drejtori Sh.T.Z. Khaled bin Sulaiman Alkhudairy. Ky Fond i ngritur nga Mbreti i Arabisë Saudite ka financuar në Shqipëri disa projekte infrastrukturore shumë të rëndësishme. 

“Sfida dhe angazhimi ynë janë projektet e rindërtimit dhe të ringritjes pas dëmeve të shkaktuara nga tërmeti. Brenda vitit 2020, çdo familje jashtë qytetit që ka humbur banesën individuale do të hyjë në një banesë të re. Po ashtu deri në gjysmën e parë të vitit, duhet të kemi ngritur në qytetet e prekura, të gjitha kantieret e lagjeve të reja. Kemi më shumë se  14 mijë familje që duhet t’i rikthejmë në shtëpitë e tyre të reja. Po ashtu kemi shumë shkolla, kopshte, spitale, qendra shëndetësore të dala jashtë funksioni, të cilat duhet të rindërtohen. Ne jemi të angazhuar që në sezonin e ri shkollor 2020-2021, fëmijët e shkollave të rrënuara, duhet ta nisin mësimin në shkolla të reja.”, nënvizoi Kryetari i Kuvendit, z. Gramoz Ruçi.

Drejtori i Fondit Saudit për Zhvillim u shpreh se, Arabia Saudite do të zgjerojë mbështetjen për Shqipërinë jo vetëm në projektet për rindërtimin pas tërmetit të 26 Nëntorit, por edhe mbështetje financiare në projekte të mëdha zhvillimore. “Ne kemi një bashkëpunim të shkëlqyer me Kryeministrin Rama dhe me qeverinë shqiptare, si partnerë shumë të besueshëm e që çdo financim nga ana jonë ka garancinë e duhur në seriozitetin e treguar nga qeveria juaj. Prandaj ne kemi vendosur të miratojmë çdo projekt që do të propozohet nga ana juaj”, u shpreh Drejtori i Fondit Saudit.