Kuvendi u mblodh në sesion të jashtëzakonshëm, miratoi tre dekrete të Presidentit të Republikës

  • Postuar më, 28/07/2022

Në drejtimin e Kryetares, znj. Lindita Nikolla, Kuvendi u mblodh ditën e sotme në sesion të jashtëzakonshëm.

Në fillim të seancës Kryetarja Nikolla lajmëroi deputetët se seanca e sotme mblidhet  me kërkesën e 28 deputetëve të grupit Parlamentar të Partisë Socialiste, me qëllim shqyrtimin e dekreteve për shkarkim dhe emërim të Ministrave brenda afatit kushtetues.

Sipas rendit të ditës, seanca plenare miratoi Dekretin e Presidentit të Republikës nr.13835, datë 26.7.2022 “Për shkarkim Zëvendëskryeministri dhe ministri”, përkatësisht shkarkimin e z. Arben Ahmetaj nga posti i Zëvendëskryeministrit dhe Ministër i Shtetit për Rindërtimin dhe Programin e Reformave.  Ky dekret u miratua me 103 vota Pro.

Më tej, seanca plenare miratoi Dekretin e Presidentit të Republikës nr.13836, datë 26.7.2022 “Për emërim ministri”, përkatësisht emërimin e znj. Majlinda Dhuka ministër Shteti dhe Kryenegociator. Ky dekret u miratua me 76 vota Pro.

Seanca plenare miratoi edhe Dekretin e  Presidentit të Republikës, nr.13837, datë 26.7.2022 “Për emërim Zëvendëskryeministri”, përkatësisht emërimin e znj. Belinda Balluku, ministër i Infrastrukturës dhe Energjisë, edhe Zëvendëskryeministër. Ky dekret u miratua me 76 vota Pro.

Seanca plenare i mbylli punimet rreth orës 17:50.


Share