Komisioni Hetimor miratoi planin paraprak të hetimit të Komisionit Hetimor.

  • Postuar më, 16/11/2015

Komisioni Hetimor miratoi planin paraprak të hetimit të Komisionit Hetimor,  për të verifikuar ligjshmërinë e emërimeve në detyrë në administratën shtetërore, entet publike apo shoqëritë tregtare shtetërore, për periudhën 15 shtator 2013 – 30 shtator 2015. Në fillim, Kryetari i Komisionit z. Genc Pollo, tha se ky ka  qenë një shqetësim i opozitës, opinionit publik, komunitetit ndërkombëtar, por dhe segmenteve të mazhorancës, përfshirja në administratën publike jo vetëm në Kuvend, përfshirja në administratën publike e elementeve me të shkuar dhe të tashme kriminale, çka dëmton atë që administrata publike duhet të bëjë, si dhe  dëmton imazhin ndërkombëtar të Shqipërisë. Ndërsa, deputeti i PS-së, Musa Ulqini, deklaroi se mazhoranca  është e angazhuar  për të hetuar çdo abuzim  me emërimet në administratën publike. “ Jemi të gatshëm  për të bërë çdo verifikim. Këtu është vetëm  një përfaqësues i opozitës. Ju e keni kërkuar këtë komision. Mazhoranca  është e gjitha  për të treguar vullnetin e saj. Ne do të përgjigjemi për çdo indicie të opozitës, por nuk mund të  kërkojmë 15 mijë dosje sepse është e pamundur që  ti shqyrtojmë”,- tha z. Ulqini. Pas diskutimeve, komisioni miratoi planin paraprak të hetimit të Komisionit Hetimor.


Share